Այս բաժինին նպատակն է մէկտեղել եւ ներկայացնել զանազան հայկական աւանդական պարեր, որոնք պահպանուած են Միացեալ Նահանգներու հայկական համայնքներուն մէջ։ Այս ծրագիրին իրականացումին համար Յուշամատեանը կը գործակցի հայկական պարերու խումբ մը մասնագէտներու հետ, որոնք իւրաքանչիւր պարի համար պատրաստած են պարային չափեր։ Խումբին անդամներն են՝ Քարոլին Ռափքիեւեան (Պար Հէրպոր, Մէյն), Սուզըն եւ Կէրի Լինտ-Սինանեան (Ուոթըրթաուն, Մասաչուսէց), Թոմ Պոզիկեան (Լոս Անճելըս, Քալիֆորնիա), Ռապըրթ Յարութիւնեան (Սանիսայտ, Նիւ Եորք)։
«Օվսաննա»ն Շատախէն (Վան-Վասպուրականի շրջան) աւանդական պար մըն է։ Տիթրոյիթի (Միշիկըն) հայկական համայնքին մէջ կը շարունակեն պարել սոյն պարը։
Տիթրոյիթէն Ենովք Ղազարեանն է, որ այս պարը տարածած է Միացեալ Նահանգներու մէջ։ Անոր որդին քլարինէթ նուագող եւ նուագախումբի ղեկավար Խաչիկ Ղազարեանն է, իսկ հայրն է Վասպուրականի աւանդական պարերու մասնագէտ Խաչիկ Ղազարեանը։
Ենովք Ղազարեանի համաձայն, «Օվսաննան» քիւրտ կնոջ մը անուան յիշատակումն է։ Թոմ Պոզիկեան այս պարը սորված է Ենովք Ղազարեանէն, մինչ Կէրի Լինտ-Սինանեան զայն սորված է Ղազար Ղազարեանէն՝ Խաչիկի եղբօրմէն։