Ապաճեան/Արսլանեանի հաւաքածոյ - Պելճիքա

Մեծապէս հարուստ է Արսլանեան/Ապաճեան ընտանիքին պատկանող լուսանկարներու հաւաքածոն։ Տեսողական այս ժառանգութիւնը մեր տրամադրութեան տակ դրաւ Անելկա Արսլանեան (ծն. Ապաճեան)։ Պատկերները կը ներկայացնեն Անելկայի ամուսինին՝ Րաֆֆիին շառաւիղները, որոնք Այնթապ քաղաքէն են։ Առաջին պատկերները հին են՝ 19-րդ դարու երկրորդ կէսէն։ Այստեղ կ՚երեւին Արսլանեան, Քիւրճեան եւ Խաչատուրեան ընտանիքները։

1) Խանում Քիւրճեան (ծն. Խաչատուրեան) եւ իր զաւակները՝ Լեւոն (նստած), Կլատիս եւ Ալիս։ Խանում մայրն է նաեւ այս պատկերին մէջ բացակայ Պէաթրիսին (յետագային Արսլանեան)։

2) Խանում Քիւրճեանի (ծն. Խաչատուրեան) երեք եղբայրները՝ Սարգիս, Յակոբ եւ Եղիա։ Կանգնած՝ անոնց կիները՝ Մարում, Էլիզա, Մարի։

Արսլանեան ընտանիքը, Այնթապ, 1905 կամ 1910։ Աթոռի վրայ նստած, ձախէն աջ՝ Մելքոն եւ Ֆերիտէ Արսլանեան։ Երկրորդ շարք, ձախէն աջ՝ Հռիփսիմէ (Լեւոնեան), Աւետիս եւ Աւետիսի կինը՝ Մարիցա։ Վերջին շարք, ոտքի ձախէն աջ՝ Արմենակ, Եսայի, Յովհաննէս եւ Նուրիցա։ Գետինը նստող աղջնակը՝ Լուսինէ։

1) Հարսանեկան պատկեր. Արմենակ Քիւրճեան եւ իր կինը, Այնթապ, մօտաւորապէս 1880-ին։ Արմենակ եղբայրն է Պէաթրիս Արսլանեանի (ծն. Քիւրճեան) հօր՝ Յարութիւնի։
2) Արուսեակ Քիւրճեան եւ իր ամուսինը (անունը եւ մականունը անծանօթ). հարսանեկան պատկեր։

3) Պէաթրիս Քիւրճեան եւ Արմէն Արսլանեան. հարսանեկան պատկեր
4) Կլատիս Քիւրճեան (Պէաթրիսի քոյրը) եւ ամուսինը (անունը անծանօթ)

Խանում Քիւրճեան (ծն. Խաչատուրեան) եւ ամուսինը՝ Յարութիւն Քիւրճեան

Քիւրճեան ընտանիքի երեխաները, Այնթապ, մօտաւորապէս 1900-ին։ Ձախէն աջ՝ Լեւոն, Պէաթրիս (ճերմակ հագուստով), Ալիս, Լուտէր (պատանի հասակով տղան), Նուրի (ձեռքը Լուտէրի ուսին դրած), Լեւոն (Նուրիի առջեւը), Մարի (ճերմակ հագուստով), Ալպէր։

1) Սուրիայի, Հալեպի Ուսումնասիրաց Լեւոնեան վարժարանի աշակերտները: Ձախին կանգնող մարդը դպրոցի հիմնադիրն է` Լեւոն Լեւոնեանը, որուն քով կանգնած են դպրոցի ուսուցչուհիները։ Իսկ աջին կանգնած մարդը` Սարգիս Պալապանեանն է:
2) Այնթապի մէջ առնուած լուսանկար։ Մարդոց ինքնութիւնները անծանօթ։

1) Սարգիս Խաչատուրեան, Պէաթրիս Արսլանեանի (ծն. Քիւրճեան) մօրեղբայրն է, Խանում Քիւրճեանի (ծն. Խաչատուրեան) եղբայրը։
2) Արամ եւ Էֆոնիա Խաչատուրեան եւ իրենց դուստրը։ Լուսանկարուած են սթիւտիոյի մէջ յատուկ այս առիթով արաբական/պէտէուիական տարազներ հագուած։ Արամ մօրեղբայրն է Պէաթրիս Արսլանեանի (ծն. Քիւրճեան)

3) Ձախէն աջ՝ Նուրի (Պէաթրիսի զարմիկը), նստող անձին ինքնութիւնը անծանօթ, Լեւոն (Պէաթրիսի այլ զարմիկ մը)
4) Արմենակ Քիւրճեան, Պէաթրիսի հօրեղբայրը, Յարութիւն Քիւրճեանի եղբայրը, հայրանուն՝ Զատիկ։

Առայժմ շատ բան չենք գիտեր թէ այս մեծ գերդաստանը ինչ ճակատագիր կ՚ունենայ 1915-ի հայոց Ցեղասպանութեան ժամանակ։ Գիտենք որ Պէաթրիս Արսլանեանի քոյրերէն Մարին իր երկու աղջիկներուն հետ կը սպաննուի Տէր Զօրի մէջ։ Ուրիշներ կը վերապրին եւ կը շարունակեն իրենց կեանքը հայրենի Այնթապէն դուրս։ Այս բաժինով ներկայացուած պատկերները կը համընկնին յետ-Այնթապեան ժամանակաշրջանին։ Պէաթրիս եւ Արմենակ Արսլանեանի ընտանիքը որոշ ժամանակ կ՚ապրի Հալէպի մէջ, ապա ընտանիքը կը տեղափոխուի Լիբանան։ Պատկերներն ալ ենթադրաբար քաշուած են Լիբանանի եւ Սուրիոյ մէջ։ Անոնցմէ ոմանք դաշտահանդէսներ են Լիբանանի կամ Սուրիոյ տեսարժան վայրերու մէջ, հաւանաբար հայկական միութիւններու կողմէ կազմակերպուած։ Կարգ մը պատկերներու մէջ կը տեսնենք դրօշներ, որոնց վրայ պատկերուած են Հ.Յ.Դաշնակցութեան զինանշանը։ Առայժմ այս պատկերները առանց բացատրութեան պիտի ձգենք, բայց յոյս ունինք շուտով մանրամասնութիւններ տեղադրել։