Միսաք Միսաքեան (հետագային Տէր Խորէն Քահանայ) հաւաքածոյ, Աթէնք

19/04/23 (վերջին փոփոխութիւն՝ 19/04/23)։ Սոյն էջը պատրաստուեցաւ գործակցութեամբ Աթէնքի «Արմենիքա» պարբերաթերթին։

Ծնած է Մանիսա, 1906-ին: 1922-ին ընտանիքին հետ իբրեւ գաղթական կը հաստատուի Յունաստան: Քանի մը ամիս հիւսիսային Սելանիկ քաղաքին մէջ մնալէ ետք, Միսաքն ու ընտանիքը կը տեղափոխուին Աթէնքի Տուրղութի/Ֆիքս թաղամաս: Պատանի տարիքէն կը ծառայէ Աթէնքի Ս. Գրիգոր Լուսաւորիչ եկեղեցիին մէջ իբրեւ դպիր, աւելի ուշ՝ իբրեւ սարկաւագ:

Միսաք կը ձերբակալուի 9 Օգոստոս 1944-ին, երբ գերմանական զօրքը եւ յոյն գործակալները կը պաշարեն Տուրղութի/Ֆիքս թաղամասը եւ պատժական գործողութիւններու կը դիմեն (պլոքօ): Շատերու նման Միսաք կը տարուի Աթէնքի մօտակայ Խայտարիի կեդրոնացման ճամբարը, ուրկէ 16 Օգոստոսին բռնի աշխատանքի կը ղրկուի Գերմանիա, ուր կը մնայ Կայզլինկընի (Geislingen) մէջ: Կը վերապրի եւ կը վերադառնայ Աթէնք:

1928. Հ. Յ. Դաշնակցութեան Աթէնքի Տուրղութի/Ֆիքս թաղամասի «Վրէժ» Պատանեկան Միութեան անդամներու խմբանկար: Ամէնէն աջին կանգնած, բաց գոյն համազգեստով պատանին Միսաք Միսաքեանն է: Կեդրոնը նստած երեք չափահասներն են՝ ձախէն աջ՝ Գաբրիէլ Լազեան, Հայ Աւետարանական Եկեղեցիի վերապատուելի մը (հաւանաբար Վեր. Յարութիւն Աճեմեան) եւ Միհրան Փափազեան:

Եգիպտոսի թեմի Առաջնորդ եւ, համատեղութեամբ, Յունաստանի թեմի ժամանակաւոր Առաջնորդ Մամբրէ Արք. Սիրունեանի ձեռամբ քահանայ կը ձեռնադրուի 1953-ին՝ Տէր Խորէն անունով եւ կը դառնայ հոգեւոր հովիւը Տուրղութի/Ֆիքս թաղամասի Սուրբ Կարապետ եկեղեցիին:

Տէր Խորէն կ’ամուսնանայ Սառա Զաքեանին հետ. կ’ունենան երկու որդի՝ Մանուկ եւ Սերգօ/Սամ:

Կը վախճանի 20 Փետրուար 1964-ին:

25 Փետրուար 1945. Միսաք Միսաքեան լուսանկարուած Կայզլինկընի մէջ գերութեան ժամանակ: Բաճկոնին վրայ ամրացուած է 147 թիւը, որ հաւանաբար անոր կալանաւորի թիւն է:

Միսաք Միսաքեանի՝ Կայզլինկընի գերութեան ժամանակներէն մնացած անկողինի ծածկոցը: Հետագային այս ծածկոցը իրեն հետ կը բերէ Աթէնք:
Յունական Կարմիր Խաչին կողմէ տրուած 15 Սեպտեմբեր 1945 թուակիր փաստաթուղթ: Նշուած է, թէ Միսաք Միսաքեան գերմանացիներուն կողմէ գերի բռնուած է, Գերմանիա արգելափակուած է իբրեւ քաղաքական բանտարկեալ եւ Յունաստան վերադարձած է 11 Սեպտեմբեր 1945-ին:
Յունական Կարմիր Խաչին կողմէ տրուած 21 Յունուար 1983 թուակիր փաստաթուղթ: Նշուած է, թէ Միսաք Միսաքեան 16 Օգոստոս 1944-ին ղրկուած է Գերմանիա, ուր արգելափակուած է Կայզլինկընի մէջ եւ Յունաստան վերադարձած է 11 Սեպտեմբեր 1945-ին:
Տուրղութի/Ֆիքսի Սուրբ Կարապետ փայտաշէն եկեղեցիին առջեւ: Կ’երեւի զանգակատունը: Կրօնաւորը Տէր Խորէն Քհնյ. Միսաքեանն է:
Աջին, առաջին կարգի վրայ քալողը Միսաք Միսաքեանն է երբ տակաւին դպիր էր Աթէնքի Ս. Գրիգոր Լուսաւորիչ եկեղեցիին մէջ: Թափօրին գլուխը, պատարագիչի եպիսկոպոսական զգեստաւորումով, կողմնակի կանգնած հոգեւորականը Յունաստանի թեմի Առաջնորդ Կարապետ Արք. Մազլըմեանն է: Նկարուած պէտք է ըլլայ 1940-ականներու վերջին կամ մինչեւ 2 Մայիս 1951 (Սրբազանին վախճանման օրը):
ՀՄԸՄ Ֆիքսի (Աթէնք) ֆութպոլի խումբը։ Առաջին շարք, կեդրոնը նստածը Միսաք Միսաքեանն է։
1956. Տուրղութի/Ֆիքսի Սուրբ Կարապետ փայտաշէն եկեղեցիին մէջ: Դպիրներու խմբանկար: Վերի շարքին կեդրոնը, գլխուն սաղաւարտով՝ Տէր Խորէն Քհնյ. Միսաքեան:
1958. Տուրղութի/Ֆիքս թաղամաս. Տէր Խորէն հիւրերու հետ:
1953. Տէր Խորէն Քհնյ. Միսաքեան Տուրղութի/Ֆիքս թաղամասի Սուրբ Կարապետ եկեղեցիի իր գրասենեակին մէջ:
1954. Տէր Խորէն Քհնյ. Միսաքեան Տուրղութի/Ֆիքս թաղամասի իր տան առջեւ:
1955. Տուրղութի/Ֆիքս, Տէր Խորէնենց տան առջեւ: Նստած, ձախէն աջ՝ Արուս Պչաքճեան, Տէր Խորէն Քհնյ. Միսաքեան, Սառա Միսաքեան (ծնեալ Պչաքճեան): Ոտքի՝ Միացեալ Նահանգներէն ժամանած ազգականուհի մը (անունը անյայտ):
1960. Տուրղութի/Ֆիքս թաղամասին մէջ. Մանուկ Միսաքեան, Արուս Պչաքճեան (Սառային մայրը), Սառա Պչաքճեան:
1957. Տուրղութի/Ֆիքս թաղամաս, Թեմական Խորհուրդի ընտրութիւններ: Կեդրոնը նստած է Տէր Խորէն Քհնյ. Միսաքեան: Տէր Հօր ձախին՝ Ներսէս Յակոբեան, աջին՝ Զաւէն Գնունի:
1954. Տուրղութի/Ֆիքս թաղամասի Սուրբ Կարապետ եկեղեցիին մէջ Տէր Խորէն երախայ մը կը մկրտէ:
1950. Տուրղութի/Ֆիքս. Արուս Պչաքճեան (ձախին) եւ Սառա Միսաքեան (ծնեալ Պչաքճեան):
1960. Հաճընի հերոսամարտի յիշատակի օրուան առիթով մատաղի ոչխարի զենում (կազմակերպիչ՝ Հաճընի Հայրենակցական Միութիւն): Ոտքի, ձախին՝ Տէր Խորէն Քհնյ. Միսաքեան, կողքին՝ Յունաստանի թեմի Առաջնորդ Սահակ Եպս. Այվազեան: Ոչխարը զենողը՝ Վահագ Սահաթճեան:
Հաճընի հերոսամարտի յիշատակի օրուան առիթով մատաղի պատրաստութիւն եւ օրհնում Տուրղութի/Ֆիքս թաղամասի Սուրբ Կարապետ եկեղեցիի շրջափակին մէջ (կազմակերպիչ՝ Հաճընի Հայրենակցական Միութիւն): Քահանաները, ձախէն աջ՝ Տէր Մատթէոս Քհնյ. Բարաղամեան, Տէր Ներսէս Քհնյ. Խոշորեան, Տէր Խորէն Քհնյ. Միսաքեան:
Տուրղութի/Ֆիքսի Սուրբ Կարապետ եկեղեցիին մէջ պսակի արարողութիւն: Տէր Խորէն Քհնյ. Միսաքեան առաջին շարքի ձախին է:
Տուրղութի/Ֆիքս, Քացիմիաս փողոց 12: Պատկերին բացատրութենէն դատելով՝ Միսաքեան ընտանիքի յոյն դրացիներ են:
270 տրախմիի ստացագիր, 15 Յուլիս 1983 թուակիր: Գումարը Միսաքեան ընտանիքի անդամավճարն է գերմանացիներուն կողմէ տուժածներու «Ֆինիքաս» (Փիւնիկ) Համայունական Միութեան:
1960. Հաճընի հերոսամարտի յիշատակի օրուան նշում (կազմակերպիչ՝ Հաճընի Հայրենակցական Միութիւն): Կեդրոնի կրօնաւորները՝ Տէր Խորէն Քհնյ. Միսաքեան եւ Սահակ Եպս. Այվազեան:
1960. Սուրբ Կարապետ եկեղեցիին մէջ կրօնական արարողութիւն: Հոգեւորականները Տէր Խորէն Քհնյ. Միսաքեանն ու Սահակ Եպս. Այվազեանն են: Ճերմակ հագուած բարձրահասակ պատանին Տէր Խորէնի որդիներէն Սերգօն:
1969. Տուրղութի/Ֆիքս թաղամասի Սուրբ Կարապետ եկեղեցիին մէջ մատաղի պատրաստութիւն:
1960, Տուրղութի/Ֆիքս (Նէոս Քոզմոս) թաղամասի հայ կաթողիկէ դպրոցին մէջ: Ձախէն աջ՝ անծանօթ կին մը, Տէր Խորէն Քհնյ. Միսաքեան, Սահակ Եպս. Այվազեան (Յունաստանի թեմի Առաջնորդ), Գաբրիէլ Վարժապետեան, Ճորճ Մարտիկեան, Լեւոն Գայեան, Յովսէփ Արք. Խանցեան (Յունաստանի հայ կաթողիկէ համայնքի Առաջնորդ), Ճորճ Մարտիկեանի տիկինը՝ Նազ/Նազենիկ, Պատրիկ Սարգիսեան, Յովհաննէս Վրդ. Գոյունեան, Ներսէս Յակոբեան (Յունաստանի Ազգային Վարչութեան ատենապետ):
1960-ականներ. Հայաստանի անկախութեան (Մայիս 28-ի) տօնակատարութիւն Աթէնքի Քենտրիքոն սրահին մէջ: Ձախէն աջ՝ Տէր Ներսէս Քհնյ. Խոշորեան, Սահակ Եպս. Այվազեան, Տէր Խորէն Քհնյ. Միսաքեան, Յովսէփ Արք. Խանցեան, Յովհաննէս Վրդ. Գոյունեան: