Պահատուրեան/Ալթուն Հաւաքածոյ - Պոլիս
Այս նիւթերը մեզի ներկայացուց Պահատուրեան/Ալթուն ընտանիքը, Դեկտեմբեր 2015-ին Պոլսոյ մէջ կազմակերպուած Յուշամատեանի ձեռնարկին ընթացքին։ Անոնք կը պատկանին Շնորհիկ Ալթունի (ծնեալ Պահատուրեան) - ծնած Կիպրոս - հօրենական եւ մօրենական ճիւղերուն։
Շնորհիկի հայրը Թովմասն է (1921-2006), իսկ հօրենական մեծ մայրն է Վարդուհի Պահատուրեան (ծնեալ Կիւրեղեան), որ ծնած է Հաճըն։ Վարդուհի ունէր քոյր մը՝ Հնազանդ, եւ երեք եղբայրներ՝ Հայրապետ, Պետրոս եւ Մանուկ։ 1911-ին Վարդուհի հարս կ՚երթայ Սելեֆքէ/Սիլիֆքէի մօտակայ Մարա/Մաարա (ներկայիս Քըրոպաշը Kırobası) գիւղը։ Ամուսինը Շնորհք Պահատուրեանն էր, նոյնպէս հաճընցի։ Կ՚ունենան չորս զաւակներ. Մանիշակ, Մանուկ, Թովմաս եւ Յակոբ։ 1921-1922-ին, Կիլիկիոյ հայութեան վերջնական պարպումի օրերուն, Պահատուրեան ընտանիքը կը գաղթէ Կիպրոս։ Այստեղ Թովմաս Պահատուրեան կ՚ամուսնանայ Արփինէ Մտածումեանի (1923-2013) հետ։
Այստեղ ներկայացուած նիւթերէն մասն մըն ալ կը պատկանի Արփինէ Մտածումեանի (Շնորհիկի մայրը) ընտանիքին։ Արփինէի ծնողները Կարապետ Մտածումեանը (1878 Հաճըն-1977 Նիկոսիա) եւ Արմենուհի Մտածումեանն (ծնեալ Սէքսէնեան, 1893-1974) են։ Երկուքն ալ հաճընցի են եւ ամուսնացած են Հաճընի մէջ։ Կ՚ունենան վեց զաւակներ. Նազիկ, Գոհարիկ, Անահիտ, Արփինէ, Շանթ, Լիլի։ Երկու զաւակներ ալ կը զոհուին Ցեղասպանութեան տարիներուն։
Լեւոն Էսկիճեանի ամուսնութիւնը Վերժինի (մականունը անյայտ) հետ, Նիկոսիա, 1926, հայկական թաղամասի Ս. Աստուածածին եկեղեցւոյ մէջ։ Հարսը եւ փեսան կանգնած են երկար մոմեր բռնած երկու աղջիկներուն միջեւ։ Յայտնի է որ Էսկիճեանները Պահատուրեաններուն մօտիկ ծանօթներն են։ Շնորհք Պահատուրեան այս ամուսնութեան կնքահայրը եղած է։ Ան կանգնած է փեսային ձախին, մոմ բռնած աղջկան (ձախ կողմի) եւ ճիշդ անոր ետեւ կեցած փոքրիկ տղուն ետին, կը կրէ ակնոցներ։ Կնքամայրը՝ Վարդուհի Պահատուրեան (հարսին աջին)։ Լուսանկարիչ՝ Աւետիսեան եղբայրք, 12 Lydra Street, Նիկոսիա։
1) Արփինէ եւ Կարապետ Մտածումեանի դստեր՝ Նազիկի (ձախին) պատկերը, իր ամուսինին (պատկերին մէջ նոր նշանուած են)՝ Գառնիկ Գույումճեանի հետ։ Նիկոսիա, 1937։ Նազիկ 1916-ի ծնունդ էր։
2) Կարապետ Մտածումեանի քրոջ թոռնիկները։
3) Պատկերը թէեւ մաս կը կազմէ ընտանեկան հաւաքածոյին, բայց լուսանկարին մէջ երեւցող անձերուն ինքնութիւնը կարելի չեղաւ ճշդել։
1) Ովսաննա եւ Հայրապետ Կիւրեղեանի ամուսնական պատկերը։ Հայրապետ եղբայրն է Վարդուհի Պահատուրեանի (ծնեալ Կիւրեղեան)։
2) Արմենուհի Մտածումեանի (ծնեալ Սէքսէնեան, 1893-1974) եւ Կարապետ Մտածումեանի (1878-1977) ամուսնական պատկերը, Հաճըն։
3) Նստած՝ Վարդուհի Պահատուրեան։ Ոտքի, ձախէն աջ՝ Թովմաս (Վարդուհիի եւ Շնորհքի զաւակը), Շնորհք, Յակոբ (Վարդուհիի եւ Շնորհքի զաւակը)։
Հարսանեկան զգեստ։ Պատկանած է Վարդուհի Պահատուրեանի (ծնեալ Կիւրեղեան)։ Ան 1911-ին ամուսնացած է Շնորհք Պահատուրեանի հետ Սելեֆքէ/Սիլիֆքէի մօտակայ Մարա/Մաարա (ներկայիս Քըրոպաշը Kırobası) գիւղին մէջ։ Վարդուհի Հաճընէն էր, Մարա ապրող ամուսինը նոյնպէս Հաճընէն էր։ Կ՚ենթադրուի որ այս զգեստն ալ պատրաստուած է Հաճընի մէջ։